Два пати поскапело кафето за три месеци. Трговците брифираат дека третото поскапување е навестено околу Нова година. Во дуќаните пакување од 100 грама стаса и до 80 денари, а она на мелење чини 70 денари. Зголемени се цените и на капучиното кои се движат од 55 до 70 денари за сто грама. Откако летоска ги потрошија залихите на нес кафе во лименка, сега тоа се продава по речиси двојно повисоки цени кои стигнаа и над 400 денари. И кафулињата пласираа нови ценовници за еспресото, макијатото и матеното нес-кафе. Граѓаните се фрапирани од оваа скапотија и на шега велат дека од традиционалното кафе со вода, останала само водата… Државниот завод за статистика измери дека едно македонско семејство лани испило речиси 7 килограми кафе.

– Свесни сме дека кафето е берзантски производ, дека доаѓа од далеку, ама што е многу, многу е. Да ти е страв човек дома да ти дојде. Со што да го пречекаш? Скапа храна, скапи пијалаци, се сведовме само на кафе, ама и на него ќе му направиме сиктер од трпезата. Можеби кафето има третман на лкусуз, ама и без него не се може. Таков ни е менталитетот – велат граѓаните.

Македонците ќе потрошат околу 14,2 милиони долари за набавка на кафе во трговијата, прогнозира Статиста, а двојно повеќе пари (29 милиони долари) ќе потрошат на кафепиење во рестораните и баровите. Според СтратеџиХеликс, пазарот на кафе во Македонија е на пат за зголемен раст од скоро 4,2 отсто во прогнозираниот период од 2024 до 2029 година. Пазарот на кафе во Северна Македонија постепено се развива, со зголемен интерес во консумацијата на кафе и кафе-културата. Урбанизацијата и изложеноста на меѓународните трендови на кафе ја поттикнуваат побарувачката за специјални производи, додека локалните преференции за силни вкусови продолжуваат да влијаат на понудите.

Ист производ, различни цени во регионот: Каде има поевтино масло, а каде е поскапо кафето?

Лани за увоз на кафе, печено или сурово, без кофеин или за замена за кафе, од Македонија сме потрошиле 34 милиони долари или за 4,35 милиони долари повеќе во однос на 2022 година, објави веб страницата „Тренд економи“. Меѓу топ десетте наши трговски партнери за увоз на кафе, на прво место е Италија со учество од 32 отсто (11,2 милиони УСД), Бразил со учество од 30 отсто (10,5 милиони УСД) и Србија со учество од 7,47 отсто (2,6 милиони УСД). Во увозот со 52 отсто учествува печеното кафе со кофеин.

Меѓународната организација за кафе (IЦО), организација основана во 1963 година со поддршка на Обединетите нации, во јули годинава објави дека композитната цена на индикаторот ИЦО како клучна референтна цена во глобалната индустрија за кафе достигна највисока просечна вредност во последните 13 години – 2,27 долари за речиси половина килограм кафе.

-Кафето е многу комплицирана стока. Една од причините за тоа е што постојат повеќе рамки на понуда и побарувачка, кои влијаат на цената“, рече Рајан Дилејни, основач и главен аналитичар на американската организација „Кофи Трејдинг Aкадеми“. Според него, во светот едноставно нема доволно кафе. Дилејни истакна дека не е невообичаено да се видат потрошувачите кои преминуваат од Арабика кон Робуста, која е поевтин вид зрно што се користи за правење инстант кафе. Меѓутоа, како што се повеќе луѓе се свртуваат кон Робуста, тоа влијае и на цените на оваа сорта на кафе.

Нов инфлаторен бран ја зафати БиХ: Поскапуваат брашното, кафето…

Светскиот извоз на кафе изнесуваше 10,76 милиони вреќи во септември 2024 година, во споредба со 8,62 милиони во септември 2023 година. Во дванаесетте месеци заклучно со септември 2024 година, извозот на Арабика изнесуваше 84,68 милиони вреќи во споредба со 73,51 милиони вреќи минатата година; додека извозот на Робуста изнесува 52,60 милиони кеси наспроти 49,41 милиони вреќи.