Мариус Борг Хоиби (27), син на норвешката принцеза Мета-Марит од нејзината претходна врска, е уапсен во понеделникот вечерта под сомнение за силување, соопшти полицијата, пренесуваат странските медиуми.

Случајот ја шокираше норвешката јавност, бидејќи Мариус иако нема официјална јавна улога, е дел од кралското семејство и израснал со полусестрата принцезата Ингрид Александра (20) и полубратот принцот Свере Магнус (18).

Полициското соопштение открива дека Мариус е осомничен за кршење на кривичниот законик, кој вклучува „сексуален однос со лице кое било во несвест или од други причини било неспособно да се спротивстави на делото“, се вели во соопштението на полицијата. Во дополнителното објаснување се наведува дека се работи за сексуален чин без целосна пенетрација.

Мариус беше приведен на 4 август по ноќен инцидент во стан на жена во Осло и обвинет за нанесување телесни повреди на жената, со која бил во врска, соопшти полицијата. Норвешките медиуми објавија дека полицијата во тоа време пронашла нож заглавен во еден од ѕидовите на спалната соба на жената. Тој повторно беше уапсен во септември поради наводно прекршување на забраната за приближување.

Според полицијата, кога бил уапсен во понеделникот, Мариус бил во автомобил со наводната жртва од инцидентот во август. Полицијата, исто така, рече дека сомнежите поврзани со инцидентот во август вклучуваат семејна злоупотреба. Тие рекоа дека допрва треба да одлучат дали ќе му биде одреден притвор.

Синот на норвешката принцеза заврши во притвор: Нападнал жена, таа добила потрес на мозокот