Натпреварувањето од Рено Твинго Купот на кое требаше да учествуваат 40 возила од екипи од четири држави, Македонија, Словенија, Србија и Унгарија и тоа во организација на АКК Рено Спорт од Скопје кој ја изнајми патеката Серес во Грција и ги подмири сите трошоци, на крајот не се одржа поради политичките притисоци од страна на грчкото министерство за надворешни работи.

Новиот претседател на Автомобилистичката федерација на Грција, кој е избран минатата недела, по налог на грчкото МНР не дозволил одржување на Твинго купот поради политички причини, ја немало додавката Северна во дозволите на македонските возачи како и во комуникацијата со Автомобилистичката федерација на Македонија.

Од Автомобилистичката федерација на Македонија (АФМ) велат дека тие имале добра соработка и комуникација со поранешниот претседател на АФГ кој бил сменет минатата недела, а случајот ќе биде веднаш пријавен во Светската автомобилистичка федерација (ФИА).  

– Ние како АФМ имавме одлична комуникација и соработка со поранешниот претседател на АФГ кој беше сменет. На собранието на ФИА во 2013 година е одлучено АФГ во комуникацијата да ни се обраќа како АФМ и досега не сме имале никакви проблеми. Со промената на нивниот претседател тоа се менува. Според АФГ, проблемот е во тоа што во лиценците на македонските возачи ја нема додавката Северна покрај Македонија. Исто така тие се повикуваат на Преспанскиот договор, но во него исто така пишува дека има транзициски период од пет години од потпишувањето на договорот за да се имплементираат тие промени. Згора на тоа, тие за сево ова го известуваат организаторот на денот на одржување на трката (сабота) и дека поради притисоци од нивното МНР нема да дозволат одржување на трката. За целиот овој настан и скандал кој го предизвика АФГ ќе ја известиме и ФИА – велат од Автомобилистичката федерација на Македонија.

Од АФМ исто така велат дека сите македонски возачи немаат никакви проблеми кои ги издава Федерацијата и на кои стои само Македонија и ја нема додавката Северна, на на меѓународните натпреварувања.

Ова е втор „удар“ на грчките власти по македонскиот спорт во последните 10-тина дена, но овој пат за жал успеаја да одложат меѓународно натпреварување. Претходно, Грците бараа да се смени амблемот на фудбалската федерација на Македонија бидејќи ја немало додавката Северна. Но, УЕФА ги олади Грците и го одби нивното барање.

ВИДЕО: Мачка го предвидува победникот меѓу Австрија и Македонија!