Аргентинскиот селектор Лионел Скалони во недела ќе има можност покрај најголемата можна награда на титулата јужноамерикански шампион што ја освои минатата година, да се закити и со светскиот трофеј.

За овој успех 44-годишниот Скалони и неговите избраници ќе треба да го совладаат бранителот на титулата Франција утре (16.00 часот).

– Јас сум ентузијаст, ова се прекрасни моменти кои треба да ги искористиме. Патот по кој тргнавме до финалето е важен, задоволството што го имавме со овие играчи. Убеден сум дека кога се забавуваме, работите имаат сосема поинаков вкус и ние ги доживуваме поинаку. Ни се приближува голем натпревар, но додека не почне мораме да ги складираме сите моменти во нашите глави – рече Скалони.

Повеќе прочитајте: СП 2022 | Тасевски: Франција е мал фаворит против Аргентина, двата тим се практично изедначени

– Финалето е повеќе од пресметката Меси – Мбапе, двете репрезентации имаат друго оружје, други играчи кои можат да направат разлика. Потребна е тимска работа за да се запре Мбапе, тој е еден од најдобрите играчи во светот, а ќе само подобар – вели аргентинскиот селектор.

Се очекува на трибините на стадионот Лусаил повеќе да доминираат аргентинските навивачи.

– Емоциите се дел од нашата култура, сè што можете да доживеете во Аргентина. Ги имаме најдобрите навивачи во светот, тие се надеваат дека ќе ги израдуваме и тоа нè допира. Фудбалот е спорт, но во Аргентина е многу повеќе од спорт – се зборовите на Скалони.