Руската армија забрзано гради засолништа и хангари за своите борбени авиони, како одговор на зголемените закани од украински воздушни напади, објави специјализираниот воен портал Defence Express.

Иако некои извештаи тврдат дека изградбата започнала дури по неодамнешната украинска операција „Пајажина“, со која беа погодени руски стратешки ракетни носачи, аналитичарите посочуваат дека ваквите заштитни мерки се преземаат уште од 2024 година. Причината била континуираните напади со украински беспилотни летала врз аеродромите на руската тактичка авијација.

Ургентноста за вакви инвестиции дополнително се зголемила откако Украина доби балистички ракети од типот ATACMS, опремени со касетни боеви глави. Една од првите воздушни бази каде што изградбата е во завршна фаза е базата Калино, лоцирана во регионот Курск, само 100 километри од украинската граница.

Со оваа иницијатива, руската армија се обидува да ја намали ранливоста на својата авијација и да одговори на новите форми на воздушна закана што ги носи модерното војување.

Поставување напуштени авиони, гуми и силуети како „мамки“

Русија презеде низа мерки за заштита на своите воени бази од воздушни напади. Покрај поставувањето системи за противвоздушна одбрана, во базите беа инсталирани противвоздушни ѕидови меѓу авионите со цел да се спречи ширење на оган и оштетување на повеќе летала при напад. Понатаму, се градат нови, засилени засолништа за авиони, кои ќе ги заштитат од напади со беспилотни летала и други индиректни оган, но поради големината на бомбардерите, не сите може да бидат опфатени со истиот тип заштита.

Дополнително, Русија користи и неконвенционални методи, како што се распоредување напуштени авиони како мамки, поставување автомобилски гуми на врвовите на авионите и сликање силуети на авиони на бетонските површини, што има за цел да ги збунува тракерите за далечинско управување.

Изградбата на засолништа за стратешките бомбардери, посебно во воздухопловната база Енгелс кај Саратов, започна уште во април 2025 година, пред операцијата „Пајажина“. Меѓутоа, најмалите типови засолништа не можат да ги сместат поголемите тактички авиони, како Су-27, Су-30, Су-34 и Су-35, а стратешките бомбардери бараат многу поголеми и посилно заштитени објекти.

Потребни се огромни хангари, но колку се ефикасни?

За да се заштити стратешкиот авион Ту-160, потребно е засолниште кое ќе може да прими авион долг 54,1 метар, со распон на крилјата од 35,6 до 55,7 метри и висина од 13,1 метри. За споредба, Ту-95МС бара засолниште со должина од 49 метри, распон на крилјата од 50 метри и висина од 13,2 метри.

Модел на вакво засолниште беше претставен во Русија само неколку дена пред нападите на стратешките авиони од украинските беспилотни летала. Станува збор за шаторско-мобилно засолниште, кое не е направено од армирано-бетонски конструкции засилени со оклопен челик. Хангарот има димензии од 60 х 65 метри, височина од 26 метри и вкупна површина од 3.900 метри квадратни. Планот е во него да се сместат не само Ту-160, туку и Ту-95, како и транспортни авиони како Ил-76 и неговите варијанти, вклучувајќи го и А-50.

Дизајнот на овие засолништа е „сендвич“ тип, со шаторско платно на горниот и долниот слој, и изолација од пена полиетилен. Предвиден е и автоматски систем за гаснење пожар. Новите засолништа за тактичката авијација се бетонски конструкции кои можат ефективно да штитат и од беспилотни летала и од касетна муниција.

Сепак, стратешката и транспортната авијација користат хангари изградени да издржат тешки временски услови. Рускиот Ту-160, Ту-95МС и други големи авиони често се паркираат и сервисираат на отворено во базите. Шаторскиот хангар може да обезбеди заштита од дронови, особено доколку може целосно да се затвори.