Во тешка состојба се повредените во пожарот во Кочани, кои што се пренесени на лекување во Бугарија. Меѓу нив, едно дете е на педијатриска интензивна нега,  посочил директорот на болницата „Пирогов“ на брифинг со новинарите. Во текот на ноќта во „Пирогов“ биле примени 8 пациенти од кои тројца се деца под 18 години, а пет пациенти се на возраст меѓу 20 и 25 години. Најстариот пренесен пациент на лекување во Бугарија има 31 година. Директорот на болницата вели дека тие се донесени во состојба на тежок термички шок.

-Сите се во тешка состојба. Едно дете е на педијатриска интензивна нега. Сите останати се на интензивна нега на клиниката за изгореници и се во исклучително тешка состојба. Тројца од нив се интубирани, а за останатите се уште се прават проценки што да се прави. Повредите се изгореници на телото, горните екстремитети и лицето. Сите имаат изгореници со вдишување чад во горните и долните дишни патишта, што е многу сериозна состојба, изјави Валентин Димитров, директор на „Пирогов“, пренесе БНТ.

Тој објасни дека лекарите во моментов прават целосна проценка на состојбата на пациентите и додаде дека болницата е подготвена да прими уште пациенти доколку е потребно.

Роднините на настраданите во трагичниот настан во Кочани, кои се пренесени на лекување во Бугарија, информации за установата за лекување во која престојуваат нивните најблиски можат да добиваат 24/7 од дежурно лице во Министерството за здравство на Република Бугарија на телефонскиот број 02/ 8050 300.