По повеќе од една година по неговото апсење, сите обвиненија за напад и обид за силување против играчот на Манчестер јунајтед Мејсон Гринвуд се отфрлени, објави во четвртокот „Дејли Мејл“.

Гринвуд првпат беше уапсен во јануари минатата година под обвинение за силување и физички напад. Недолго потоа, во јавноста се појавија вознемирувачки фотографии и аудио снимки од целиот настан, во кој наводно е нападната осумнаесетгодишна девојка.

Гринвуд беше уапсен вторпат во средината на октомври 2022 година за прекршување на условниот отпуст.

Судењето започна во ноември, а потоа беше одложено за 27 ноември оваа година, а во четвртокот Гринвуд беше ослободен од сите обвиненија против него.

– Истражителите цело време беа во контакт со правниот тим. Оваа одлука не беше донесена лесно. И покрај медиумскиот и јавен интерес за овој случај, решивме да не коментираме повеќе. Сакаме да ја изразиме нашата определба дека сите наводи за насилство врз жените секогаш се детално испитани, без разлика на околностите – соопшти обвинителството.

Наводните настани за кои Гринвуд беше осомничен и обвинет се случија помеѓу 1 ноември 2018 и 15 октомври 2022 година. По апсењето Гринвуд остана без голем број спонзори, без место и плата во тимот, како и без место во репрезентацијата на Англија.