Хигиеничарите се искачија висок на врвот на најбарани занимања во Македонија. Според податоците на Агенцијата за вработување, со 1.095 слободни работни места, нивната побарувачка е далеку над барањата за општи работници (442), продавачите (385) и возачите на камиони за кои има 258 слободни позиции. Кризата не удри на оваа професија, бидејќи се бараат сите оние што се искусни во средувањето не само на деловните простории, туку на приватни куќи или резиденции, а неретко за таа работа се нуди договор на неопределено време, бонус или превоз.

Со оглед на фактот дека станува збор за неквалификувана работна сила, платата на хигиеничарите е околу законскиот минималец, но на социјалните мрежи може да се најдат огласи на кои се нуди плата и до 35.000 денари! За крпата и метлата најчесто се фаќаат жените.
Основната причина за ваквата побарувачка првенствено се огромните шопинг молови, кои располагаат со илјадници квадрати површини што секогаш треба да блескаат, но од компаниите чија дејност е одржување на станбениот и деловниот простор, велат дека има сè повеќе граѓани што живеат сами, а заработуваат доволно за да не губат време во неделно или месечно одржување.

Потребата за чистачки ја наметнуваат и фирмите што управуваат со зградите, кои во цената на одржување мора да обезбедат чисти влезови и сите други внатрешни површини. Потрагата по хигиеничарите трае веќе неколку години, но во последниов период станува сè поизразена со флуктуацијата на вработените, велат за „Слободен печат“ од неколку фирми кои се во дејноста.

– Станува многу тешко, а сега во летните месеци кога дел од вработените користат летни одмори е уште потешко. Се чини дека сите бараат работа за да не ја најдат. Ќе пуштиме оглас, ќе се јават, ќе дојдат на разговор и откако ќе ги договориме деталите, не се јавуваат повеќе, па дури и го исклучуваат телефонот. Најчесто сакаат да не ги пријавуваме, да одработат, да си земат дневница и не се појавуваат повеќе – велат во една фирма за одржување деловни и станбени простории.

Овие компании стравуваат и дали ќе може да одговорат на годишните договори за одржување на канцеларискиот простор, а тоа им влијае врз деловните планови.

– Ако немате доволен број вработени, договорите пропаѓаат. Основниот проблем е што работниците шетаат од фирма во фирма, со надеж за повисока плата. Главно станува збор за лица без образование или со најмногу основно и добиваат минимална плата, иако имаме вработени и со повисоки плати. Знаеме дека времето е тешко, со 21.500 денари не се преживува, па им нудиме и превоз и храна, во надеж дека ќе ги задржиме, но во последно време менаџерите се жалат дека вработените ќе речат дека одат на пауза и воопшто не се враќаат. И во оваа професија има заминувања во странство – велат од друга фирма за одржување хигиена.

Сè потешко е да се најде добра жена за чистење иако тие доаѓаат со препорака, за да не ве измамат, велат повеќе домаќинки со кои контактираше „Слободен печат“.
– Имам чистачка и тоа со препорака од мои пријателки, но не сум задоволна. Плаќам 1.600 денари за двапати месечно одржување на хигиената, но секогаш има оправдување зошто не е сработено сè што е договорено. Уште и постојано се заканува дека ќе напушти, бидејќи нема доволно жени за чистење – вели револтирана скопјанка.

– Препораката е клучниот збор во оваа работа. Но и јас не одам кај секого. Полесно ми е да имам неколку добри клиенти и да им се посветам целосно, а неретко чистам кај повеќе членови од едно семејство – вели една чистачка, која веќе неколку години не прима нови муштерии.

Вчера на веб-страницата на Агенцијата за вработување беа огласени повеќе од една илјада слободни работни места за хигиеничари на станбен и на деловен простор. Огласи пуштаат и кафеани, хотели, фабрики и друго. На списокот на невработени што активно бараат работа, најмногу се лицата со никакво или со најниско образование, за кои има и најмногу огласи за вработување. Без образование и со основно образование е секој втор невработен или 63.342 од вкупно 107.049 пријавени невработени на крајот од јуни. Меѓу лицата што бараат работа, според бројот, следуваат невработените со завршено средно образование, кои ги има над 26.103, а во потрага по работно место се и 559 магистри и 20 доктори на науки.

 Во Србија поскапеа услугите на чистачките

Минатата година чистачките во Србија ја зголемија цената на работниот час на 350 денари, што е двојно повеќе во однос на периодот пред пандемијата, кога цената на еден час работна рака се движеше околу 150 денари. Жените што се нафаќаат на оваа тешка работа, според пишувањето на Блиц.рс. може да заработат месечно и до 70 илјади денари и тоа ако работат 8 часа дневно или 25 дена месечно!
Инаку, највисока заработувачка имаат чистачките во Данска – 2.500 евра, без сместување. Платата на хигиеничарка во Германија е 2.000 евра со храна и сместување, 1.800 евра заработуваат чистачките во Австрија, без храна и со обезбедено сместување, додека во Хрватска таа се движи околу 1.100 евра на море, без сместување и храна. Според едно германско истражување, работата на црно во домаќинствата помеѓу 2005 и 2017 година опаднала за
само 5 отсто, а и натаму на црно работат 89 отсто од чистачите.