„Работата не е завршена додека земји од Унијата се нудат за медијација“, смета претседателката Гордана Сиљановска Давкова, прашана за изјавата на претседателот на Советот на ЕУ, Антонио Кошта. Иако Кошта рече дека нема простор за што повеќе да се разговара, Сиљановска вели дека патишта за разговор постојат, откривајќи дека има понуди од Австрија и Обединетото Кралство.

„Јас, се разбира, со помош на господинот Кошта, заедно ќе разговарам со господинот Радев. Како што слушате исто така, Австрија се понуди за медијација во разговорите. Не се нудат членки на ЕУ за уште еден разговор и медијација ако работата е завршена.“, порача Гордана Сиљановска Давкова.

Таа рече дека треба да се обезбедат гаранции кои не се надвор од актуелната преговарачка рамка, додавајќи дека покрај со Радев, може да се разговара и со бугарскиот премиер Росен Жељазков.

Според Сиљановска Давкова, ако земјите од Унијата велат дека ветото е лош пристап во процесот на проширување, Македонија треба да оди во пресрет на укинувањето на ветото.

„Ова мене ми личи на цврста одлука да укинете смртна казна, која е срамна, ама велите , ајде сега уште овој осуден ќе го егзекутираме, ама од после извесно време или од идниот некој момент, нема да има смртна казна. Не може ние да бидеме колатерална штета“, вели претседателката.

Претседателот на Советот, Кошта, претходно рече дека „не постои план Б“ за интеграцијата на земјава во ЕУ и дека треба да се работи на процесот на измени за внесување на Бугарите во Уставот. Кошта ѝ пренел на претседателката дека иако предлогот за измени со одложена примена е „извонреден“, тој е одбиен од Бугарија. До крајот на месецов се очекува Скопје да го посети и високата претставничка на Унијата за надворешна политика, Каја Калас.