Силјановска Давкова ја прифаќа преговарачката рамка, Пендаровски ја обвини дека нема решение за ЕУ-интеграциите
Кандидатката за претседател од ВМРО-ДПМНЕ Гордана Силјановска Давкова вечерва изјави дека ја прифаќаат Преговарачката рамка, но не и уставните измени.
Препорачано
Во претседателската дебата заедно со кандидатот за претседател поддржан од СДСМ Стево Пендаровски на ТВ21 потенцираше дека уставните измени нема да го решат проблемот, туку дека напротив ќе го продлабочат.
„Преговарачката рамка ние ја прифаќаме. Ние не го прифаќаме само елементот врзан за уставните измени и мислиме дека со поинаква добрососедска интерпретација, дека ако се копенхагенски критериуми во прашање може вето, нека си разговараат комисиите инаку не може да се употреби тоа за вето и ги почитуваме европските темелни вредности и принципи и преговарачката рамка, ама и себе претседателе“, рече Силјановска Давкова.
На прашање како земјава ќе го продолжи патот кон ЕУ и како ќе се надмине проблемот со закочените измени во Уставот, Силјановска Давкова рече дека ако некој ги закочил уставните измени, тоа е сегашниот технички премиер, бидејќи не го ставил во првата фаза на гласање предлогот за измени на Уставот, само помина во Комисијата.
Во телевизиски дуел на телевизија 21, претседателскиот кандидат Стево Пендаровски истакна дека неговата противкандидатка нема одговор како ќе ја надминеме блокадата на патот на државата кон Европската Унија, односно како ќе се надмине проблемот со закочените измени на Уставот.
„Значи, вие не одговоривте, не кажувате како ќе се откочат тие промени, односно како ќе се деблокира нашата сегашна блокада кон Европската Унија, претпоставувам тоа е суштината на вашето прашање. Значи, партија која три години наназад правеше улични протести против европската преговарачка рамка и цело време изјавува дека само како Бугари сме можеле наводно да влеземе во Европска Унија не може да се вади на процедурални работи”, потенцираше Пендаровски.
