Дваесет и петгодишно момче загинало, а уште четири лица се тешко ранети при експлозија на рачна бомба на забава во градот Книн во Хрватска.

Бомбата „м-75“, според првичните наоди од истрагата, на забавата ја донел едно од момчињата, а се активирала во рацете на негов врсник, идентфикуван како М.П.

Тешко се ранети две момчиња на возраст од 23 и 25 години, девојка на возраст од 21 година и уште една малолетна девојка, која во критична состојба е префрлена во болница во Сплит.

Директорката на Општата болница „Хрватски понос“ во Книн изјави дека повредите на младите луѓе се многу тешки. Едно лице било итно оперирано, а другите со рани во градниот кош се на интензивна нега, со цел да бидат префрлени на понатамошно лекување во Сплит кога ќе им се стабилизира состојбата.

Полицијата апелираше до граѓаните што чуваат или кријат оружје и експлозив во своите домови итно да ги предадат, без да се соочат со какви било казни или мерки.