По повеќе од една година меѓународна кривична истрага предводена од хрватската полиција во соработка со ДЕА и Европол, уапсена е седумчлена група која набавувала кокаин, чија вредност се проценува на околу 800 илјади евра, пренесува Индекс.

Како што соопштија утрово УСКОК, апсењата се извршени не само во неколку хрватски жупании, туку и во Чешка. Имено, таму е идентификуван чешки државјанин кој бил дел од овој синџир.

Како што пренесува Индекс, дрогата била скриена во разни магацини во Хрватска. Неколку од нив биле и во Загреб. Дел од кокаинот, како што произлегува од мерките за таен надзор под кои оваа група била држена цела година и пол, бил складиран и во сефот на едно кафуле.

Извори за медиумот откриваат дека два угостителски објекти во самиот центар на Загреб биле вклучени и во синџирот на препродажба и криење дрога. Станува збор за кафуле и пицерија која освен во Загреб е присутна на уште неколку локации низ Хрватска. Дали дрогата била само складирана таму или препродавана преку сопственикот ќе се утврди во продолжението на истрагата.

Осомничените ги испрашуваат истражители во УСКОК, кои потоа ќе одлучат дали и за кого ќе побараат притвор.