Серија движења кои повикуваат на бојкот е одговор на промените во американската политика, вклучително и оние поврзани со руската агресија врз Украина и царините за европските производи. Поддржувачите на бојкотот сметаат дека тоа ќе изврши притисок врз американската администрација. Вакви движења за бојкот на производи од Соединетите Американски Држави беа основани и во Шведска, а беа организирани преку социјалната мрежа Фејсбук. Швеѓаните се повикани да не купуваат производи и услуги од некои од водечките американски брендови, вклучително и Мекдоналдс, Кока-кола, Најк, Левис, Нетфликс, Гугл и Арбиенби, објави Кликс.ба.

Јанике Кохинор, креаторката на групата „Бојкота варор фран УСА“, изјавила дека се чувствувала обврзана да го стори тоа, иако е шведска државјанка.

„Кога веќе не можам да гласам на американските избори и да протестирам на американските улици, почувствував дека морам да направам нешто“, рече Кохинор.

На нејзината страница се споделуваат препораки за алтернативни производи на американските, но на некои не им е лесно да бојкотираат.

„Тешко е бидејќи сè има американско влијание. Така што е ужасно тешко. Тогаш треба да бојкотирате речиси сè“, напишал еден од членовите на споменатата група на Фејсбук.

Понатаму, еден член напиша дека ја разбира иницијативата, но призна дека може да биде тешко да се убедат луѓето да ги бојкотираат американските производи бидејќи можеби не размислуваат од каде доаѓаат тие производи кога ги купуваат.