Денеска во полуфиналето од втората квалификациска рунда во женската Лига на шампионите, на турнирот во Геверле, Белгија, македонскиот фудбалски првак ЖФК Љуботен загуби убедливо со 5:0 од Розенгард.

Мируваа мрежите до 44 минута кога нигериската фудбалерка на шведскиот клуб Имо донесе предност за својата екипа од пенал.

На стартот од второто полувреме за зголемување на предноста се погрижи Сјостром (52`), а по втор пат во листата на стрелците на мечот се запиша Имо (59`).

Во следната минута тренерот на ЖФК Љуботен Егзона Јашари доби црвен картон. Во 80 минута за 4:0 стрелаше Ларсон, а конечниот епилог го постави истата фудбалерка во судиското надополнување (90+1`).

ЖФК Љуботен на турнирот во Геверле ќе игра за третото место против СКФ Сараево од Босна и Херцеговина или белгискиот Леувен. Победникот ќе обезбеди пласман во новоформираниот Европа Куп на УЕФА.