Шведската влада планира повторно да го врати рударството на ураниум во земјата за да ја задоволи растечката побарувачка за критични суровини и да ја намали зависноста од увоз, објави министерката за животна средина и клима, Ромина Пурмоктари, цитирана од агенцијата Франс Прес. Рударството на ураниум во Шведска беше забрането во 2018 година од еколошки и економски причини – ризици од загадување на водата и радиоактивност, како и прекумерни трошоци со пристап до светскиот пазар. Сегашната влада го врати прашањето на дневен ред. Според Геолошкиот завод на Шведска (SGU), резервите на ураниум во земјата сочинуваат околу 27 проценти од ресурсите на Европа.

„Со оглед на безбедносната ситуација (проблемите) во кои се наоѓаат Шведска и Европа, важно е да го зголемиме нашиот степен на самоодржливост во критични суровини, вклучувајќи ураниум и други метали“, рече Ромина Пурмоктари.

Не сакаме да бидеме зависни од земјите што се диктатури, рече таа, додавајќи дека е горда „што сега ја укинуваме забраната за рударство на ураниум“ во Шведска. Се очекува законот да стапи на сила на 1 јануари 2026 година, бидејќи владата има мнозинство во парламентот (Риксдаг). Шведска моментално увезува ураниум од Канада, Австралија, Казахстан и Намибија, според владини податоци. Скандинавската земја се потпира на нуклеарна енергија за да ги задоволи своите потреби за електрична енергија, кои се очекува да достигнат околу 300 терават часови (TВч) до 2045 година, според владини проценки, пренесува БТА.