Редовно чистење и миење на сите улици во Скопје, дезинфекција и дезинсекција на местата каде што се лоцирани контејнерите, но и на контејнерите, итна набавка на пет нови камиони за собирање смет, итна набавка на пет нови еколошки чистачи на улици. Ова се дел од мерките кои ги предложи советникот од СДСМ, Гордан Шутаров на денешната вонредна седница на Советот на Град Скопје, посветена на актуелбата состојба со ЈП „Комунална хигиена“.

Покрај тоа, тој од говорницата ги повика сите државни институции да ги испитаат детално сите наводи во поднесените кривични пријави и во оние кои ќе се поднесуваат, да направат детална проверка на договорите за вработување за они луѓе за кои има сомнеж дека не доаѓале на работа, а земале плата, но побара и одговорност за сите што директно и индиректно учествувале во креирањето на овие состојби.

Шутаров смета дека треба да се направи проверка на договорите за вработувања и во останатите јавни претпријатија, ревизија на работата на Управниот и Надзорниот одбор во „Комунална хигиена“, но и да има редовни и чести координации помеѓу градоначалникот на Град Скопје, претстедателот на Советот и координаторите на советничките групи.

Тој нагласи дека ова што се случи со отпадот е трета по ред ситуација која му се случуваше на Скопје во својата историја, по случувањето со буџетските сметки на градот и со јавното сообрачајно претпријатие.

Шутаров потсети дека јавното претпријатие „Комунална хигиена“ е основано уште во 1944 година и 79 години континуирано ги сервисира услугите кон граѓаните.

 Наше е да ги најдеме причините зошто дошло сега до таква ситуација и да најдеме решение – рече советникот.