Членовите на Синдикатот на контролорите на летање се договорија да отстапат, односно да го стават во мирување најавениот штрајк за 25 декември и на 1 јануари, соопшти Едмонд Каличи, член на Синдикатот. Според Каличи, едната причина е да се види начинот на селекција на вработените, како што стои во Колективниот договор, а втората е новонастанатата ситуација во која има 8 студенти-контролори, на кои им истекуваат договорите до крајот на годината и не им се продолжени, а не е побарано од Министерството за транспорт и врски тоа да биде направено. И конечно, според Каличи, една од причините да не се штрајкува е фактот што доаѓаат новогодишните празници, кога повеќе македонски граѓани се враќаат во земјава, а има и поголем прилив на туристи.

– Затоа се решивме да го ставиме штрајкот во мирување и да ја следиме целата ситуација со конкурсот во јануари – додаде Каличи.

Александар Тасевски, претседател на Синдикатот на Контрола на летање, го потврди тоа што го кажа неговиот колега и додаде дека будно ќе ја следат целата постапка со новиот конкурс, ќе бидат во комисијата за селекција, сè со цел да се вработат квалитетни кадри, кои и онака се дефицитарни во Контролата на летање.

– Видовме дека изборот на оперативен кадар ќе биде пролонгиран ако инсистираме на штрајкот, па требаше да го прифатиме рокот што го постави раководството. А со оглед на фактот дека догодина ќе има избори, новите вработувања тешко ќе се реализираат во догледно време – додаде Тасевски.

Бочварски: Убеден сум дека контролорите на летање ќе отстапат од најавата за штрајк

Како што е познато, контролорите најавија предупредувачки штрајк на 25 декември и за Нова година, како реакција на објавените огласи за вработувања во М-НАВ, со критериуми, кои според претседателот Тасевски, се спротивни на постигнатата спогодба со менаџментот од октомври годинава. Министерот за транспорт и врски Благоја Бочварски, завчера истакна дека е убеден дека Контролата на летање ќе отстапи од најавата за штрајк.

– На минатата средба во октомври имавме четири прашања што беа отворени и на сите се работи во координација со Синдикатот, остана уште едно прашање за кое дискутиравме повторно. Граѓаните да бидат сигурни дека правиме се и правиме напори, а убеден сум дека контролорите од таа најава ќе отстапат, тие ќе имаат свој состанок. Но, по она што го дискутиравме, заклучивме дека интересот на граѓаните и на државата мора да биде пред сè и над сè – изјави Бочварски во средата.

Инаку и во октомври, контролорите се заканија со штрајк поради непрофесионалното однесување од директорите во однос на вработувањата и внатрешните прераспоредувања, а на кои се укажувало долго време, а за проблемите го информирале и Министерството за транспорт и врски.

– Да престане хаотичното однесување и да се однесуваат професионално, а контролата на летање да си го добие своето место и во рамките на балканските контроли на летање и во Европа. Во служби што се превработени се зголемува бројот, се распишуваат конкурси што траат по три дена, а лицата што ги ангажираат на тие работни позиции не можат да одговорат на потребите на работниот процес, што потоа се користи како изговор пак за дополнителни вработувања – рече тогаш Тасевски.

Едно од барањата на Синдикатот на контролори на летање е и да се ангажира надворешна фирма што ќе врши анализа за тоа кои служби и кадри се потребни, а која во иднина би била поткрепа при, како што велат, неоснованите постапки од страна на раководството.

Контролорите за летање реагираат и за застарената опрема која, како што велат, откако е инсталирана во 1999 година, досега само се одржува, иако треба да се менува на секои седум години. Поради ваквата состојба на опремата, како што укажа претседателот на Синдикатот, годинава биле воведени рестрикции и не биле прифаќани поголем број авиони за прелет.

Македонското небо затворено за Нова година, ако не бидат повлечени огласите за вработување