Што точно значи етикетата „белгиско чоколадо“? И дали постои гаранција за географско потекло зад тој термин, ако не и за квалитетот на производот? Или е тоа само маркетиншки трик на производителот кој се „шлепува“ на славата на квалитетот на белгиското чоколадо? Се чини дека сепак е второто.

„Видете, токму пред некој ден купив урми во белгиско чоколадо, можете да најдете и некои протеински плочки со истата етикета, а „Хаген-Дац“ има сладолед направен од белгиско чоколадо“ – велат граѓаните.

Треба да е од Белгија, ама… Што всушност значи терминот „белгиско чоколадо“? Од хрватското Министерство за земјоделство, толкуваат дека производителот, доколку доброволно го наведе потеклото на состојката на пакувањето, треба да го стори тоа само ако таа состојка всушност е произведена во земјата што е наведена како потекло.

„Имено, доколку субјект во прехранбениот бизнис сака, на доброволна основа, да го информира потрошувачот дека како состојка се користи „белгиско чоколадо“, што според перцепцијата на потрошувачот би значело чоколадо произведено во Белгија, таа информација мора да биде во согласност со принципите на фер информирање – односно мора да биде точна, јасна и не смее да биде заблудувачка во врска со потеклото на храната. Исто така, треба да се внимава задолжителните информации да не бидат скриени, покриени или прекинати од други текстуални или сликовни претстави или друг материјал“, соопшти Министерството, пренесува Каматица.

Сепак, од повеќето примери, јасно е дека не е можно со сигурност да се утврди земјата на потекло на чоколадото, бидејќи производителите обично не ги наведуваат овие информации. На пример, на пакувањето на сладоледот „Хаген-Дац“ пишува дека земјата на потекло на производот е Франција, а земјата на потекло на главните суровини е ЕУ. Не е јасно која би била главната суровина во овој случај, но ако станува збор за чоколадо – што би било логично, бидејќи сладоледот е именуван по него – се избегнува да се наведе Белгија како земја на потекло. Исто е и со сладоледот Мочи. Земјата на потекло на целиот производ е Велика Британија, но не е наведено дали чоколадото навистина доаѓа од Белгија. Производителот на урмите во белгиското чоколадо е потранспарентен – на оригиналната декларација е конкретно наведено дека урмите доаѓаат од Иран и дека чоколадото е произведено во Белгија, па затоа можеме да му веруваме на овој производ.