Теа Трајковска е талентирана пејачка, која смело ја гради својата музичка кариера. Теа дебитираше со песната „Ехо“ од албумот „Која сум јас“ во 2015 година. Оттогаш остана доследна на својот уникатен стил и вокал, а секоја нејзина песна несомнено остава трага.

Постојано создава музика и е во чекор со светските трендови. Нејзини најпознати песни се „Која сум јас“, „Што би било“, „Сенки“, а нејзината најнова песна која ја промовираше неодамна e „Гори“, за која се потпишува и како композитор и како аранжер.

Помеѓу бројните обврски, Теа најде време за нас и ни откри како отприлика изгледа еден нејзин ден.
„Утрото ми почнува со голема чаша кафе и правење план за обврските кои ги имам тој ден. Потоа го шетам кучето, одам на тренинг и тоа се единствените константи во моето секојдневие – кафе, прошетките со Тоби и вежбањето.

Секој ден ми е различен зависно од тоа дали имам свирка, проба со мојот бенд, некое снимање или патувам за Тетово за да работиме со Лазе на некоја нова песна.

Последниов период ми е посебно динамичен, со промовирање на мојот нов сингл „Гори“, а веќе работиме и на следните проекти кои со нетрпение ги чекам и многу им се радувам.

Навистина, никогаш не ми е монотоно и досадно – тоа е предноста на нашата професија. Вечерите кога не настапувам ги поминувам во друштво на пријателите на кафе или пијачка. Ако сум за полабава варијанта вклучувам Нетфликс, во моментов ја гледам серијата „Бриџертон“.

Ме мотивира секој нов ден како нов предизвик да живеам за соништата, работите и луѓето што ги сакам.“