Дина Јовановска, или попозната како Дина – Рингтонс, е пејачка во скопскиот кавер бенд „Рингтонс“. Покрај музичката насока од една страна, и завршениот Машински факултет – насока Индустриски дизајн од друга, Дина работи и маркетинг во фирмата за мебел и ентериер „Смарт ливинг“ во Скопје.

Љубовта кон музиката ја открива уште во раните години, а првите чекори во музиката ѝ започнуваат кога запишува нижо музичко училиште во ДМБУЦ „Илија Николовски Луј“ на шестгодишна возраст, каде учи солфеж и клавир.

Во 2005 година, за првпат почнува да се занимава со хорско пеење, во „Женски младински хор“ кај проф. Запро Запров со кој учествува на многубројни натпревари и е добитник на голем број награди и признанија.

Од 2016 година, па до денес е активен член на бендот „Рингтонс“. Со бендот настапува на многу места во земјава – од редовни свирки во барови и клубови, до настани како: Пиволенд, Винтерленд, Прв до врв, Размрдај го ГТЦ, Култура во време на корона итн.

Иако составот најчесто изведува поп, рок и рокенрол странски хитови, во 2018 добиваат покана за формирање на состав кој ќе ја претставува македонската музика во проект наречен „Македонски шлагери“. Проектот наидува на огромен интерес, па наместо една сезона, продолжува петта година по ред, како концертен настан во просториите на „Public Room“ во Скопје.

Овојпат, омилената пејачка на скопската публика ни сподели како изгледа еден нејзин ден.

„Не постои утро каде што кога ќе се разбудам не ми поминува мирисот на утринско кафе пред нос, и едвај чекам да станам за да се напијам. Без утринско кафе, верувам како и многу други, не функционирам. Доколку сум дома го пијам сама, на работа го пијам со друштво на моите колеги и денот официјално може да почне.

Во „Смарт ливинг“ е динамично, цело време нешто се работи и се спрема. Како доаѓа пролет, така се зголемуваат повеќе активностите и проектите, па затоа е многу важно организациски да си спремен. Откако ќе завршат состаноците на тема – до кај сме, што сме, се фаќаме за работа и тоа трае до 16 или 17, некогаш до 20 часот, поради флексибилноста на работните смени. Работата ми е доста интересна и креативна, од организација на интересни кампањи и соработки, до графички дизајн и менаџмент социјални медиуми, па поради тоа секогаш брзо ми летнува денот.

Во екот на пандемијата, од целосно активен човек кој не се прибира дома, останав целосно затворена дома, па и качив некое килце. Бидејќи сакам да се чувствувам убаво во своја кожа, цврсто и со енергија, почнав активно да вежбам четирипати неделно и да внимавам со нездравите, ама слатки задоволства во однос на храна. Вежбањето освен тоа што прави да се чувствувам подобро, ми помага полесно да ги поминувам напорните свирки кои некогаш знаат да бидат и по две во една вечер.

Од четврток до сабота имам редовни настапи со бендот и најчесто можете да нѐ најдете во четврток во „Tribeca“, секој петок во „Public Room“ на Шлагери, во клубот Маракана и скоро секоја сабота на различно место. Периодов најчесто во сабота патуваме во Охрид и свириме во „Liquid Cafè“.

Секој слободен момент го користам да го поминам со фамилијата и моето куче Аја која е белгиски овчар и нормално дека има свој профил на Инстаграм: @ayathemalinois.

Секогаш кога ќе ме види е пресреќна и едвај чека да излеземе надвор и да играме со топчето. Бидејќи живее со моите родители, кога не можам да ја видам физички, му ѕвонам на татко ми на видеокол и си правам муабет со неа. Звучи пресмешно, ама драги луѓе – кучето зборува со мене.

 

View this post on Instagram

 

A post shared by Aya The Malinois (@ayathemalinois)

Поради природата на моето секојдневие и фактот што се занимавам со музика и прилично гласни настапи, мирот и тишината кога ќе дојдам дома ми се неопходни. Често пуштам добар филм или серија, а некогаш се заглавувам на Јутјуб видеа со часови.

Недела е ден за генералка дома, дружба со пријатели, некој добар фамилијарен ручек и се разбира – Формула 1 трки. Огромен фан!“