Регионалниот дефект во електроенергетскиот систем, кој на 21 јуни доведе до прекин на електричната енергија во речиси цела Црна Гора, делови од Хрватска, Босна и Херцеговина и Албанија, е предизвикан од прекин на два далноводи со разлика од 13 минути, објави Европската мрежа на електропреносни системи за оператори на енергија (EНТСО-E), пренесува „Вијести“, информира Н1.

„Истрагите кои досега беа спроведени доведоа до следнава серија настани: Во 12:09 часот поради краток спој беше исклучен 400 kв далновод Рибаревина – Подгорица 2 во Црна Гора. По овој дефект, оптоварувањето на неколку други линии беше зголемено без да се создаде преоптоварување на мрежата и без проблеми со напонот или фреквенцијата. Во 12 часот и 22 минути поради краток спој беше исклучен 400 kв далновод Земблак – Кардија меѓу Албанија и Грција.

И двата настана на прекин резултираа со инцидент со неколку прекршувања на системот во однос на оптоварувањето и напонот на линијата. По ова второ исклучување, напонот во југоисточниот дел на континентално-европскиот електроенергетски систем почна забрзано да опаѓа“, соопшти ЕНСТО-Е, пренесува Вијести.

„Каскадното исклучување на далноводите брзо доведе до пад на напонот и прекин на напојувањето со електрична енергија во погодената област. Напоните продолжија да паѓаат на нула, додека од другата страна на одвојната линија се вратија во нормала“, соопшти ЕНТСО-Е по состанокот на заедничкиот експертски панел.