Откако Владата одлучи да воведе пилот програма за сеопфатно сексуално образование во 9-тиот степен на основното образование во четири училишта, започнаа дискусиите во јавноста.

Професорката по македонски јазик од гимназијата „Корчагин“, Татјана Алексиќ, која на јавноста и е позната по телевизискиот проект „Сексуална азбука“ во изјава за „Слободен печат“ вели дека воведувањето на предмет по сексуално образование е потребно за правилен емоционален развој на децата, како и за намалување на ризиците од несакана бременост.

– Јас дефинитивно сметам дека треба да се воведе сексуално образование за учениците. Важно е многу да се внимава при изборот на содржини, а предавањата да ги вршат надворешни соработници, кои ќе внимаваат, не само на содржината, туку и на сензитивноста на темата – вели Татјана.

Таа додава дека најважно е децата да ги знаат последиците од неинформираноста, а со тоа да се спречи несакана бременост или сексуално преносливи болести.

Во ХЕРА, со поздравување ја дочекаа веста за воведувањето сексуално образование. Оттаму велат дека младите континуирано се соочуваат со неинформираност и недоволен пристап до релевантни информации за нивната сексуалност, здравје и благосостојба, што е причина за 19,5 абортуси на 100 раѓања, колку што се регистрирани во 2017 година.

„ХЕРА во соработка со Министерството за образование и Бирото за развој имаат соодветна стратегија и план како најдобро да се спроведува сексуалното образование во формалното образование. Во моментот се работи на подготовка на прирачник за пилот програма по кој наставниците би го спроведувале сексуалното образование, а темите од прирачникот (Род, Врски и односи, Тело и слика за своето тело, Сексуално и репродуктивно здравје, Сексуалност, Насилство и Граѓански аспекти) се адаптирани на возраста на младите и се во согласност со насоките на УНЕСКО. Младите, родителите и професорите постојано имаат прашањата чии одговори не можат да ги најдат во рамките на училиштето и  наставните програми, што  само ја потврдува итната потреба од воведување на Сеопфатно Сексуално Образование во формалното образование“, велат од ХЕРА за „Слободен печат“.

Како одговор на обвинувањата и стравувањата на родителите дека сексуалното образование ќе им биде мотивација на децата порано да започнат со сексуален живот, од ХЕРА велат дека сеопфатно сексуално образование  ја зголемува возрасната граница за стапување во први сексуални односи.

„Компаративната пракса од другите држави и тоа како укажува на фактот дека навремената едукација и информираност со придонесува да се намалува бројката на малолетни непланирани бремености, абортусите и насилството во училиштата, а младите формираат ставови со кои покажуваат поголема разбирање и толеранција во однос на родовите прашања и различностите“ додаваат од организацијата.

Според програмата, пилот проектот ќе започне во две училишта во урбана средина, едно во рурална средина и едно училиште каде мнозинство од учениците се од малцинските етнички заедници. Од Министерството за образование побаравме одговор за кои училишта станува збор, и дали предавањата ќе ги вршат наставници или надворешни обучувачи, но не добивме одговор.

Екипата на „Слободен печат“ денеска излезе меѓу граѓаните за да ги слушне нивните мислења.

Ставовите се поделени, на оние кои ја поддржуваат програмата, и оние кои се против.

И едните и другите ги прашавме зошто, а од нивните одговори се забележува дека сексуалното образование во Македонија се уште е табу тема.