Поевтините производи во Србија поскапуваат побрзо од оние кои традиционално имаат повисоки цени. Тоа практично значи дека киселото млеко поскапува побрзо од кајмакот или свинскиот бут од стекот. Во финансискиот речник оваа појава се нарекува чипфлација, а неодамна ја запозна и српскиот пазар. Тоа го потврди и анализата на Народната банка на Србија, која наведува дека во претходниот период трговците сè почесто ги покачувале цените на поевтините производи.

Истражувањето на НБС опфати 58 производи, меѓу кои и месни производи, кондиторски и млечни производи, кафе и безалкохолни пијалаци, односно сè што просечниот купувач во Србија купува речиси секој ден, потсетува Каматица. Потврдено е дека за три години во просек најевтините брендови од сите овие производи се зголемиле за околу 40 отсто, додека најскапите скокнале за приближно 35 отсто. Причината за тоа секако е падот на куповната моќ, што влијаеше луѓето да се свртат кон поевтини производи, што ја зголеми нивната побарувачка, а тоа резултираше и со зголемување на цените. Друга причина е фактот што навистина се зголемени трошоците, а тоа се однесува, на пример, за поскапувањето на материјалите, суровините и изворите на енергија.

Душан Узелац, уредник на порталот Каматица, наведува дека потрошувачите во Србија моментално се соочени со вистински жонглерски чин, преминувајќи од акција во акција за да купуваат поевтино:

– Поевтин производ не мора нужно да биде со послаб квалитет. Но, соочени сме, за жал, со ситуација кога имаше некакво отстапување, односно одредени производи се исклучени од потрошувачката, за луѓето да се прилагодат на буџетот што го имаат, а кој поради инфлацијата станува сè помал. Анализата на НБС, исто така, потврди дека феноменот на чипфлација се случил токму кога инфлациските притисоци биле најсилни, што е втората половина на 2022 година и почетокот на 2023 година.