Германскиот производител на автомобили „Фолксваген“ објави дека претрпел загуба од 1,3 милијарди евра во првата половина од оваа година поради увозните тарифи на САД што ги воведе американскиот претседател Доналд Трамп.

Во соопштението се вели дека „Фолксваген“ го намалил профитот поради наглото намалување на извозот на германски автомобили во САД, пишува „Гардијан“.

Се вели дека компанијата засилено ја спроведува реорганизацијата, која предвидува намалување на 35.000 работни места до 2030 година.

Групацијата „Фолксваген“ ги произведува и брендовите „Ауди“, „Сеат“ и „Шкода“, како и луксузните брендови „Ламборгини“ и „Бентли“, како и комерцијални возила, меѓу нив и камионите „Сканија“.

Германскиот канцелар Фридрих Мерц апелираше до Трамп итно да потпише договор за царини со концесии за автомобилската индустрија на ЕУ.
Германскиот извоз на автомобили во САД нагло се намали во април и мај, бидејќи царините наметнати од Трамп ја погодија продажбата на автомобили на нивниот најважен странски пазар, соопшти во четврток германското здружение на автомобилска индустрија ВДА.

Во соопштението се вели дека извозот на автомобили во САД се намалил за 13 проценти во април и за 25 проценти во мај во споредба со истите месеци минатата година. Забележано е дека 64.300 возила биле испорачани во САД во текот на двата месеца.

Пред враќањето на Трамп во Белата куќа, САД наплаќаа царина од 2,5 проценти за увоз на автомобили произведени во Европа, додека ЕУ имаше царина од 10 проценти за возила увезени од САД.

ЕУ сега е блиску до договор со САД за општи царини од 15 проценти за повеќето стоки, без конкретен исклучок за автомобилската индустрија, доколку се постигне договор пред крајниот рок на Трамп на 1 август. Брисел во четвртокот соопшти дека верува оти договорот е „на дофат“.