Пандемијата на коронавирусот ќе остави долгорочни рани врз општеството, предупреди германскиот претседател Франк-Валтер Штајнмаер на екуменска конференција во Франкфурт.

– Социјалните последици од вирусот нема едноставно да исчезнат со последната вакцинација, последната мерка, рече Штајнмаер во своето завршно обраќање.

Германскиот претседател предвидува дека нема да има целосно враќање на старото.

– Сепак, повторно обединување со семејството и пријателите, ракување, гушкање и одржување на миси како што знаеме – сите со нетрпение го очекуваме тоа, рече Штајнмаер.

Тој истакна дека борбата против вирусот била жестока, и оти светот живее во време на задолжителното носење маски, ограничувања и ублажувања, вакцини и приоритети за вакцинација…

На многумина им пропаднаа врските, се распаднаа пријателства, а семејствата беа поделени, посочи германскиот претседател.

Но, екуменската конференција покажа дека католиците и протестантите имаат повеќе заедничко од она што ги дели, рече Штајнмаер, додавајќи дека ова важи и за општеството во целина.

Затоа, тој повика на изградба на мостови меѓу оние кои пандемијата ги направи непријатели.