Репрезентацијата на Грузија славеше победа на Евробаскетот, совладувајќи ја Шпанија со убедливи 83-69. Тимот на Грузија одигра сигурен натпревар, во кој доминираше речиси во сите четвртини, додека Шпанците имаа само едно кратко водство во текот на мечот.

Грузијците рано стигнаа до двоцифрена предност (19-9), но Шпанија успеа до крајот на првиот период да се врати на само три поени негатива (20-17). Најизедначен дел од натпреварот беше втората четвртина, кога Шпанија и поведе со 33-32, но Грузија на одмор замина со минимална предност (37-35).

Во второто полувреме, Грузија одново презеде контрола над натпреварот.  Клучниот момент се случи пет минути пред крајот, кога разликата повторно порасна на +10 (70-60) по што исходот беше јасен.

Александар Мамукелашвили беше најефикасен кај победничкиот состав со 19 поени, Гога Битадзе додаде 15, а Токо Шенгелија натпреварот го заврши со 13 поени. Кај Шпанија, најдобар стрелец беше Вили Хернангомез со 13 поени, додека Аладама и Бризуела запишаа 12, односно 11.

Во вториот натпревар од денешната програма, Израел без многу проблеми го совлада Исланд со 83-71.