Германскиот канцелар Олаф Шолц на средбата со израелскиот премиер Бенјамин Нетанјаху на маргините на Генералното собрание на ОН, ги поддржа напорите за изнаоѓање компромис за контроверзните судски реформи во Израел.

Шолц ја истакна важноста на најшироката можна социјална поддршка за ваквите фундаментални реформи и ја истакна посветеноста на израелскиот претседател Исак Херцог на ова прашање, изјави вчера портпаролот на германската влада Штефен Хебестрајт по 50-минутните разговори.

Херцог бара компромис во спорот што го дели израелското општество со месеци и редовно води до масовни протести. Засега не е познато дали Шолц разговарал со Нетанјаху за израелските критики на германскиот амбасадор во Израел, Штефен Зајберт, бидејќи присуствувал на сослушување поврзано со реформите во правосудството.

Во понеделникот Шолц го поддржа Зајберт во Њујорк. „Германскиот амбасадор е многу посветен човек со многу јасни принципи. И верувам дека сите го знаат тоа и во Израел“, рече тој како одговор на новинарско прашање.

Десничарската влада на Израел формално протестираше поради присуството на Зајберт на сослушувањето на Врховниот суд за контроверзниот закон. Израел смета дека ова е мешање во внатрешните политички работи, објавија локалните медиуми.

Слична порака беше пренесена и на германската министерка за надворешни работи Аналена Бербок која исто така го поддржа Зајберт наведувајќи дека „сосема е нормално да се оди на јавни расправи или јавни судски процеси“.

На крајот на јули, израелската влада донесе контроверзен закон како дел од нејзините напори за реструктуирање на судството, отстранувајќи ја способноста на Врховниот суд да презема мерки против „неразумните“ владини одлуки.

Сепак, критичарите сметаат дека дејствијата на владата се закана за израелската демократија и предупредуваат дека земјата е во процес на претворање во диктатура. Владата на Нетанјаху, од друга страна, тврди дека Врховниот суд е премногу моќен во Израел и дека премногу се меша во политичките работи.