Најдобриот полски фудбалер на сите времиња и рекордер по бројот на голови за националниот тим, Роберт Левандовски, ја шокираше фудбалската јавност во својата земја.

Преку објава на својот профил на Инстаграм, напаѓачот на Барселона соопшти дека донел одлука привремено да се повлече од репрезентативниот дрес додека Михал Пробиерж седи на селекторската клупа. Причина за оваа одлука е последниот потег на селекторот, кој му ја одзеде капитенската лента на Левандовски и ѝ ја довери на Пјотр Зјелински.

„Со оглед на настанатите околности и губењето на довербата од страна на селекторот, решив да не настапувам за Полска додека тој е на чело на тимот. Се надевам дека повторно ќе добијам шанса да играм пред најверните навивачи во светот“, напиша Левандовски на социјалните мрежи.

Конфликтот меѓу капитенот и селекторот кулминираше откако Левандовски одби да настапи во јунскиот репрезентативен прозорец, наведувајќи замор од напорната сезона. Таквиот потег предизвика лавина реакции во јавноста, а по растечкиот притисок, напаѓачот пред два дена гостуваше на телевизија каде детално ги објасни причините за одлуката и отворено го критикуваше селекторот, истакнувајќи дека уште претходно бил искрен со него за своите намери.

Левандовски ја носеше капитенската лента на „белите орли“ од 2014 година, а зад себе има 158 настапи и 85 погодоци – рекорди кои засега никој не му ги приближува. Пробиерж, пак, ја води полската селекција од 2023 година, но оваа одлука може да му донесе повеќе главоболки отколку стабилност.