Македонскиот претставник Шкендија вечерва во Разград ќе го одигра реваншот од плеј-офот за пласман во групната фаза на Лигата на Европа, против бугарскиот шампион Лудогорец. Тетовци патуваат со позитивен резултат од 2:1 од првиот натпревар во Скопје и се наоѓаат на чекор најголемиот успех во клупската историја.

Иако Лудогорец важеше за фаворит во овој двомеч, Шкендија покажа зрелост, квалитет и голема борбеност, наговестувајќи дека може рамноправно да се носи со далеку поискусниот противник.

Дуелот ќе се игра на „Хуверфарма арена“ во Разград, стадион со капацитет од 10.423 гледачи, а стратегот на Шкендија, Јетон Беќири, на вчерашната прес-конференција порача дека неговиот тим влегува со целосен респект, но и со силна самодоверба.

„Веќе направивме голем чекор, но мора да останеме мотивирани и гладни за уште. Лудогорец е фаворит на хартија, но фудбалот не е секогаш логичен – има многу примери каде финансиски посилни екипи биле елиминирани. Ќе дадеме сè од себе“, изјави Беќири.

Доколку Шкендија успее да ја задржи предноста, ќе стане втор македонски клуб кој ќе игра во Лигата на Европа, по историскиот настап на Вардар во 2017 година.

Натпреварот започнува во 19:30 часот, а тетовските навивачи со нетрпение очекуваат уште една незаборавна европска вечер.