Денеска со почеток од 18.00 часот на стадионот „Тофик Бахрамов“ во Баку, Азербејџан, ќе се игра реваншот од третото квалификациско коло во Лигата на шампионите меѓу Карабах и Шкендија.

Фудбалерите предводени од тренерот Јетон Беќири во првиот меч загубија со 1:0 во Скопје, но веруваат дека шансите не се загубени и со сите сили ќе се обидат да ја анулираат негативата и на крајот да излезат како победници во овој двомеч.

Беќири најави на прес-конференцијата дека неговиот тим ќе биде поагресивен и повеќе ќе напаѓа.

Се очекува Карабах да има поддршка од 30.000 гледачи од трибините.

Доколку тетовските „црвено-црни“ го елиминираа азербејџанскиот претставник, ќе обезбедат пласман во плејофот на ЛШ и воедно би имале најмалку сигурна лигашка фаза во Лигата на Европа.

Главен судија на денешниот меч меѓу Карабах и Шкендија ќе биде Дани Макели од Холандија.