Во неделата се одиграа шест натпревари од 27 коло во Првата македонска фудбалска лига (ПМФЛ) во кои само на еден меч немаше победник.

Шкендија на домашен терен со 4:0 беше убедлива против Воска Спорт, во првиот дел во листата на стрелците се запишаа Адеми во 32 и Тамба во 38 минута. Во второто полувреме Ибраими во 51 минута стрелаше за 3:0, а конечниот епилог го постави Каба во судиското надополнување (90+2`).

Силекс ја оствари највисоката победа откако со 5:0 го декласираше составот на Беса 1976. За клубот од Кратово хет-трик постигна Ѓорѓиевски, а по еден погодок запишаа Алиќ и Додев.

Немаше победник на дуелот Вардар – Тиквеш (2:2), во 41 минута тимот од Кавадарци стекна позитива преку Садик, а пред паузата (45+2`) за израмнување се погрижи Закариќ.

Тиквеш дојде повторно во водство во 53 минута преку Мишов, а скопските „црвено-црни“ во финишот успеаја да дојдат до бод со голот на Сенгхор (90+3`).

Работнички направи чекор назад во борбата за титулата, откако претрпе пораз од актуелниот шампиоон Струга (1:0). Гостите дојдоа до триумфот со голот на Укпа во 54 минута.

Гостивар го надигра Шкупи со 3:1, иако тимот од Чаир дојде прв до позитива во петтата минута со погодокот на Имери, следуваше пресвртот на домаќините кој прво израмнија во 10 минута со голот на Глишиќ.

За 2:1 стрелаше Ервин во 69 минута, а конечниот епилог го постави Ајдини (90+1`).

Брера го совлада Пелистер (2:1), струмичкиот тим дојде во позитива во 38 минута со голот на Ѓоргиевски, потоа во 70 минута Ндзенгуе постигна гол за 2:0, а битолската екипа до крајот на мечот само го ублажи својот пораз во 92 минута преку Трајкоски.

Прва македонска фудбалска лига
27 коло
Недела, резултати:

Гостивар – Шкупи 3:1, Пелистер – Брера Струмица 1:2, Работнички – Струга 0:1, Шкендија – Воска Спорт 4:0, Силекс – Беса 1976 5:0, Вардар – Тиквеш 2:2.

Табела: Шкендија 59 бодови, Силекс 55, Работнички 49, Гостивар 47, Струга 45, Шкупи 33, Вардар 29, Пелистер 29, Брера Струмица 24, Беса 1976 24, Тиквеш 23, Воска Спорт 22.