Фудбалерите на хрватскиот клуб Шибеник на поранешниот македонски репрезентативец Леонард Жута денеска одбија да тренираат поради неисплатени обврски.

Како што известуваат хрватските медиуми катастрофалната финансиска состојба на клубот и месеците неисплатени плати се одамна познат факт. Фудбалерите на Шибеник немаат добиено ниту едно евро од декември минатата година. Тоа значи дека не примиле плата во цела 2025 година.

Последниот натпревар Шибеник го одигра во неделата против Хајдук на Пољуд (пораз 1:0), по што тренерот Рајко Видовиќ им даде одмор во понеделник. Кога тимот се собра во вторникот во 15 часот, наместо на тренинг, тие решија да бојкотираат.

Информациите за можен штрајк кружеа со денови. Управниот одбор предводено од претседателот на клубот Жељко Карајица им вети на играчите дека долговите ќе бидат подмирени до крајот на март, но тоа не се случи.

Тренерот Видовиќ закажа нов тренинг за среда во 10 часот, но доколку не се случи чудесна исплата преку ноќ, денешното сценарио може да се повтори.