Исчезнувањето и наводното убиство на двегодишната Данка Илиќ, по која се трага од 26 март, се уште е голема мистерија за пошироката јавност. Имено, не се знае како тече истрагата за овој случај бидејќи надлежните институции речиси и не се огласуваат, но тоа наскоро треба да се смени со оглед на тоа што септември е крајниот рок за покренување обвинение против двајцата осомничени кои се во притвор од почетокот на април. Од друга страна, и по речиси половина година од исчезнувањето, телото на двегодишното девојче се уште не е пронајдено- пишува Еуроњуз-Србија.

За потсетување, Вишото јавно обвинителство во Зајечар досега има сослушано околу 20 сведоци за овој случај. Меѓу нив имало и жители на Бањско поле, местото каде што исчезнала Данка, како и еден борчанец кој тој ден имал спортски активности недалеку од депонијата, за која постои сомневање дека е местото каде што осомничените првично го фрлиле телото. На почетокот на јули исказ дал и осомничениот Д.Д. а тоа право го барал преку својот адвокат.
Исто така, не се знае под кои околности во притвор на борската полиција на 7 април починал братот на еден од осомничените, кој беше осомничен дека помагал во прикривање докази. Ниту пет месеци подоцна, јавноста не знае дали неговата смрт била природна или насилна.

Од Вишото јавно обвинителство во Ниш за Еуроњуз Србија изјавија дека од 25 април се овластени да преземаат мерки и дејствија согласно „Методологијата за истрага во случаи на злоупотреба“ за утврдување на околностите под кои тој починал.
Во нивното соопштение наведуваат дека на 29 април поднеле барање за прибирање на потребните информации до Секторот за внатрешна контрола и Министерството за внатрешни работи во Белград со цел да се добијат сите потребни информации за расветлување на настанот. .

„Случајот е во предистражна фаза, во која согласно законот активно се преземаат други мерки и дејствија за прибирање докази и расветлување на предметниот кривичен настан“, соопштија од обвинителството. Посочија и дека јавноста ќе биде навремено информирана за дејствија за кои во моментот на постапување постои оправдан интерес јавноста да знае.

Игор Јуриќ од Центарот за исчезнати и малтретирани деца во интервју за Еуроњуз Србија изјави дека она што не смее да се заборави, а на што треба постојано да се инсистира е фактот што телото на девојчето се уште не е пронајдено и тоа е она што фрла посебно светло на самиот случај.

„Данка се уште е исчезната, а не можеме ни да претпоставиме каде би можела да биде. Јас лично се уште не можам да верувам дека двајцата осомничени го криеле телото толку добро што толку многу специјалци и доброволци не можеле да го пронајдат“, рече Јуриќ.

Коментирајќи ја истрагата и досегашните резултати, како и колку е сигурно дека наскоро ќе биде покренато обвинението, факт е дека на самиот почеток е направена грешка и дека сега е тешко да се исправи. Но, Јуриќ наведува и дека смета оти институциите можеби имаат одредени информации и докази кои доколку бидат јавни, евентуално би можеле да влијаат на натамошниот тек на истрагата, но и на судењето.