Шеснаесетгодишното девојче по кое се трага, вчера влегло во реката Вардар да се капе, но реката го повлекла, а дваесет и деветгодишната девојка која се капела со неа не успеала да ја извлече.

Според информациите од МВР, случајот бил пријавен во СВР Велес вчера попладне околу 16.30 часот.

– Било пријавено дека К.П.(29) од Скопје, со привремен престој во с.Уланци, општина Градско и 16-годишно девојче од с.Уланци, додека се капеле во водите на реката Вардар во близина на село Уланци, малолетничката била одвлечена по течението на реката. К.П. неколку пати се обидела да ја извлече, но не успеала – велат од МВР.

Веднаш по пријавата, полициски службеници од СВР Велес во координација со САЕ Тигар, Единицата за специјални намени Волци на Армијата, припадници на Дирекцијата за заштита и спасување, Територијалната противпожарна единица и кајакари од кајакарски клуб од Велес започнале потрага за пронаоѓање на девојчето, која беше прекината во 20.50 часот и продолжи денеска.

За инцидентот вчера соопштија од Центарот за управување со кризи од каде кажаа дека сестрата на девојчето вознемирена пријавила во полиција и побарала помош. Потрагата по девојчето продолжува и денеска.