Извршниот директор на Мекларен, Зак Браун, смета дека е „неизбежно“ возачите Ландо Норис и Оскар Пјастри да се судрат на патеката во одреден момент додека се борат да ја освојат титулата во Формула 1.

Лидерот во конкуренција на возачи, Пјастри, има 10 поени предност пред второпласираниот Норис по пет трки сезонава, откако забележа три победи споредено со една победа на неговиот тимски колега.

Ready to take to the Miami circuit 👊#McLaren | #MiamiGP 🏝️ pic.twitter.com/Ej9RU7Lnle

— McLaren (@McLarenF1) April 30, 2025

Пјастри и Норис, чиј следен двобој е на гран-при во Мајами претстојниов викенд, имаат одврзани раце да се тркаат меѓусебе, затоа што Мекларен нема назначен возач број еден.

Засега немало поголеми инциденти меѓу двајцата, иако Браун очекува тоа да се промени.

– Мислам дека дефинитивно прашањето е кога, а не дали. Имате двајца возачи, без разлика дали се во ист или во различен тим, кои се еден до друг 24 трки, некој ќе ја блокира сопирачката – вели Браун.

Зачудувачки, но Браун вели дека ќе се радува кога тоа ќе се случи?!

– Некако се радувам да завршиме со тоа, бидејќи не мислам дека ќе биде ни приближно толку возбудливо како што сите мислат. Мислам дека ќе имаме тркачки инцидент кога ќе дојде тој ден. Мислам дека е неизбежно. Тие се двајца одлични карактери. Ниту еден од нив не е вжештена глава, па затоа не сме загрижени за тоа и до одреден степен некако се радуваме само да го тргнеме тоа од патот – вели Браун.

Мартин Брандл, коментаторот на Скај спортс, вели дека прифаќањето на Браун дека ќе има судир Пјастри-Норис значи дека тимот нема да западне во криза кога тоа навистина ќе се случи.