Изненадувачка информација утрово објави македонскиот медиум на албански јазик „Инфоспорт“. Наводно, Бесарт Ибраими ќе си замине од редовите на актуелниот шампион во ПМФЛ, Струга Трим Лум.

Не се објавуваат причините, но се наведува дека Ибраими веќе ја разгледува и опцијата да се врати во Тетово во дресот на Шкендија, каде што веќе настапуваше.

Во редовите на Струга, Ибраими пристигна во 2022 година, а претходно во кариерата во странство беше дел од Ксанти од Грција, Ермис и Енозис од Кипар, Таврија, Металург Запорожје, Севастопол од Украина и германски Шалке 04. Во Македонија покрај Шкендија и Струга настапуваше за Ренова, Напредок и Велазерими.

Нема дилеми дека заминувањето на 37-годишниот напаѓач би бил сериозен удар за Струга, која во текот на летото доведе познати имиња од македонскиот фудбал, но сепак и оваа година немаше успех во европските квалификации.