Министерот за образование и наука Јетон Шаќири најави дека од јануари, директорката на Државниот испитен центар ќе може да ги зголеми платите на вработените за 30 отсто.

Има нов колективен договор, нови одлуки на Министерството за финансии и нов начин на зголемување на платите. Од јануари директорката на ДИЦ ќе има простор да ги зголеми платите за 30 отсто. Мислам дека со тоа проблемот ќе се реши. Јас никогаш не велам дека не треба повисоки плати. Но, кога некој во јавноста сака да стане популарен и да блокира 500 наставници, тоа не е во ред – изјави Шаќири за ТВ24.

Синдикатот на Државен испитен центар продолжува со штрајкот, бараат покачување на платите за 25 отсто

Синдикатот на ДИЦ најави дека штрајкот ќе продолжи. Околу 700 кандидати чекаат да полагаат за лиценца што ја издава ДИЦ, но поради штрајкот тоа нема да се случи во оваа сесија, а загрозена е и државната матура.

Во Државен испитен центар има малку вработени, со многу големи и сериозни задачи и одговорност на секој вработен, но тоа никој не го цени и го смета за небитно. Се надевам дека сепак ќе има слух, дека реално ќе преговараме и дека тоа што велат дека заслужуваме повеќе и дека не сме реално платени, дека ќе биде решено за сите 29 вработени. Нашите барање се да се извршат измени на посебниот Колективен договор со кој наместо 78 ќе добиеме 25 проценти зголемување на платата – изјави Емилија Бошковска, претседателка на синдикалната организација на ДИЦ.

Синдикатот на ДИЦ го почна штрајкот на 25 април годинава со барања за поголеми плати за вработените и согласност за нивниот колективен договор. Синдикатот ги стопираше сите процеси за кои е надлежен ДИЦ, меѓу кои и полагањето на државната матура која се одржа во мај. Штрајкот продолжи во декември, откако ДИЦ и Министерството за финансии не пронајдоа решение за зголемување на платите на вработените.

Штрајкот на синдикатот на ДИЦ ќе влијае на стручниот испит за наставници и соработници, загрозена е и државната матура