Реакциите околу менувањето на наставната програма за шесто одделение со која се интегрираат предметите Историја, Географија и Граѓанско образование, министерот за образование и наука Јетон Шаќири вели дека ќе ги достави за мислење до Бирото за развој на образованието.

Тоа е институција која ја има предложено Концепцијата за основно образование и која треба да анализира какво влијание има интегрирањето на предметите врз учебната програма и реакциите во однос на предметите Историја и Географија, појаснува Шаќири.

По даденото мислење на Бирото, МОН ќе извести за ситуацијата.

-После тоа ние како МОН ќе известиме за ситуацијата, откако ќе добиеме конкретни податоци какво влијание има интегрирањето на тие предмети врз неделниот фонд на часови на тие што ги предаваат, а исто така и содржински, и ќе одговориме на сите тие што имаат пратено допис или јавно реагираа, изјави Шаќири одговарајќи на новинарски прашања по учеството на тркалезната маса „Антикорупциско образование – пристапи и предизвици“.

Рече дека со новата концепција има порано интегрирање на предметите во модули што треба да се учат во една учебна година како група на предмети во Природни науки и Општествени науки.

-Интегрираните предмети почнуваат од петто одделение според Концепцијата за основно образование и оваа година продолжуваат во шесто, а наредните години и во седмо, осмо и во деветто одделение, рече Шаќири.

Историчарите вчера побараа Министерството за образование и наука да стави мораториум на Концепцијата и под итно да организира широка јавна дебата, која ќе биде заснована на сеопфатна анализа која ќе ги артикулира и досегашните негативни импликации од нејзиното воведување, како и ставовите на научната и академската заедница.

Како Здружение на историчарите на Република Македонија, чијашто повеќе од седумдецениска дејност меѓу другото е насочена кон развојот на македонската историографија и унапредувањето на квалитетот на наставата во македонската историја, потсетуваме дека многупати и тоа во повеќе форми, јавно предупредивме на негативните импликации од крајно избрзано донесената Концепција за основно образование, која што беше целосно отфрлена од сите релевантни научни и високообразовни институции, пишува во реакцијата.