Северна Кореја тестираше нешто што изгледа како хиперсонична ракета во близина на нејзиниот источен брег, но таа експлодираше во воздух, соопшти војската на Јужна Кореја.

Ракетата била лансирана од близина на главниот град Пјонгјанг, соопшти началникот на здружениот генералштаб на Јужна Кореја. Јапонското Министерство за одбрана соопшти дека проектилот летал на височина од околу 100 километри и дострел повеќе од 200 километри.

Високи функционери на Јужна Кореја, САД и Јапонија одржаа телефонски разговор и го осудија лансирањето како кршење на повеќе резолуции на Советот за безбедност на ОН и сериозна закана за мирот и стабилноста во регионот и пошироко.

Поморскиот корпус на Јужна Кореја соопшти дека нивните војници организирале вежби за гаѓање во близина на поморската граница со Северна Кореја за прв пат откако Сеул го укина меѓукорејскиот воен пакт на почетокот на овој месец. Вежбите беа најавени претходно во јуни.

Американската индо-пацифичка команда, исто така, издаде осуда и го повика Пјонгјанг да се воздржи од понатамошни незаконски и дестабилизирачки акти.

„Иако оценивме дека овој настан не претставува непосредна закана за американскиот персонал или територија или за нашите сојузници, ние продолжуваме да ја следиме ситуацијата“, се вели во соопштението.

Последното лансирање на ракета од Северна Кореја беше на 30 мај. Северна Кореја оваа недела го критикуваше распоредувањето на американски носач на авиони на заеднички вежби со Јужна Кореја и Јапонија и предупреди на „преголема, нова демонстрација на одвраќање“.

Лансирањето на ракетата доаѓа еден ден по 74-годишнината од почетокот на Корејската војна.

Минатата недела севернокорејскиот лидер Ким Џонг Ун и рускиот претседател Владимир Путин одржаа самит и потпишаа пакт за заемна одбрана. Сеул, Вашингтон и Токио го критикуваа продлабочувањето на воената соработка на двете земји, при што јужнокорејскиот претседател Јун Сук Јеол го нарече пактот „анахроничен“.

Севернокорејскиот државен медиум КЦНА објави во средата масовен митинг во Пјонгјанг за да ја одбележи годишнината од војната, нарекувајќи го ден на „борба против американскиот империјализам“ и нарекувајќи ги Соединетите држави главен непријател.

Неодамна, Северна Кореја испрати стотици балони со ѓубре кон јужнокорејските градови и распореди голема група војници за изградба на нови утврдувања во силно вооружената граница меѓу двете Кореи, тврди војската на Јужна Кореја.