Сестрата на загинатата Фросина Кулакова, во соопштение до медиумите вели дека семејството Кулакови се приклучува кон утрешните протести за кои вели дека се протести на тагата, на народот и на желбата да се остане во Македонија.

Фросина Кулакова загина во сообраќајка што ја предизвика младиот Васил Јованов, на пешачки премин на „Партизанска“ додека таа го поминувала булеварот на зелено светло шетајќи го своето куче.

Сестрата на Фросина вели дека протестот кон кој се приклучува семејството не е против владата на која ѝ се благодарни. Протестот почнува во 16 и 30 утре, пред Универзална сала, после што се оди до владата.

-Ние како семејство јавно се заблагодаривме и сме благодарни на досегашната поддршка на владата. Не протестираме против владата, напротив, бараме да продолжи да не поддржува нас како семејство, но и да го поддржи барањата што ќе произлезат од протестите. Истото го бараме и од опозицијата, вели таа.

Потоа протестот е предвидено да продолжи пред собранието од кое се бара да се променат законите и парламентот да контролира како тие закони се спроведуваат. Крајот на протестот закажан за утре е пред апелациониот суд во Скопје.

-Бараме да се свестат дека гнојот во општеството доаѓа од овде. Бараме да сфатат дека и тие се дел од народот. Бараме судската власт да престане да ги брани нечесните меѓу нив, а веруваме дека сите судии и обвинители не се исти, додава таа.