Судот во германскиот град Вупертал вчера започна судски процес во кој три лица се обвинети за уцена на фамилијата на седумкратниот шампион во Формула 1, Михаел Шумахер.

Според доказите, еден од обвинетите кој се води како лидер на оваа криминална група, со веќе постоечко криминално досие, со цел да не објави приватни семејни фотографии и видеа на социјалните мрежи, за возврат побарал 15 милиони евра, наведува германската новинска агенција ДПА.

Оваа уцена била голем шок за семејството, со оглед на фактот дека по несреќата на легендарниот формула возач во 2013 година, кога се здоби со тешки телесни повреди по главата при скијање, фамилијата е целосно повлечена од јавноста и воопшто не објавува слики или видеа на социјалните мрежи.

Лидерот на групата е обвинет за уцена и изнуда, додека пак останатите две лица, се обвинети за соучество.
Како уценувачки материјал биле користени УСБ копии од 1500 приватни фотографии и 200 видеа од семејството, кои биле украдени од страна на еден од обвинетите, тој бил поранешен член на компанијата која што го обезбедувала домот на Шумахер во Швајцарија.

На вчерашното судење, по сослушување на изјавите на обвинетите и сведоците, 53-годишниот водач на групата го признал делото и се изјаснил како виновен за уценување на семејството.

– Преземам одговорност за делото, јас ја направив оваа глупост – изјави обвинетиот кој додаде дека навистина му е жал и длабоко се извини на сопругата на Шумахер.

Следното судско рочиште се очекува да биде кон крајот на декември, а конечната пресуда за тројцата обвинети се предвидува за во јануари 2025 година.