Познатиот српски актер Милош Биковиќ првпат стана татко на 9 јануари. Неговата вереница Ивана Малиќ роди момче, кое го доби името Василије.

Сега семејството е конечно заедно, а среќните родители уживаат во првите моменти со својот наследник.

Ивана досега немаше објавено ништо откако се породи, а сега го направи тоа на својот инстаграм-профил, каде сподели слика од преслатко боди со мече за малото момче.

Да потсетиме, Милош Биковиќ и Ивана Малиќ се во романтична врска нешто повеќе од две години.

Актерот за првпат ја претстави својата избраничка пред јавноста на премиерата на филмот „Јужен ветер 2: Забрзување“ („Јужни ветар 2: Убрзање“) во 2021 година.

Оттогаш тие беа на неколку патувања – од уживање на прекрасните плажи на Малдиви до скијање на француските Алпи.

Инаку Малиќ е по потекло од Црна Гора, а по професија е правничка. Ова е прво заедничко дете за двојката.

„Среќни сме што наскоро ќе станеме родители. Ова е важен, веројатно најважниот момент во нашите животи. Засега не сакавме да го откриеме, но папараците нѐ доведоа во ситуација да немаме избор. Ви благодариме на сите за убавите зборови и честитки, а ги молиме медиумите и новинарите да ја почитуваат нашата одлука и интегритетот на нашиот приватен живот. Кога ќе сакаме да разговараме на оваа тема, дефинитивно ќе ве контактираме“, напиша Биковиќ на својот инстаграм-профил пред неколку месеци.