Хартии, остатоци од храна, шишиња, лименки и друг отпад, кои наместо во поставените канти, несовесни граѓани во текот на ноќта ги расфрлале наоколу во близина на трговскиот центар „Бисер“ е сликата која честопати можат да ја забележат жителите на Аеродром во овој дел од општината.

Велат дека ова постојано се случува и во секој период од годината, затоа што во вечерните часови деца и млади луѓе се собираат пред тамошниот млечен ресторан, јадат и отпадоците ги фрлаат каде ќе стигнат.

Општина Аеродром остро реагира на ваквото однесување и упатува апел до граѓаните да се грижат за јавните површини и местата на кои секојдневно се движат.

 Нашите комунални служби се постојано на терен и ја одржуваат чистотата на највисоко можно ниво, но потребна е поголема свест од страна на секој еден од нас и заедно да се потрудиме да ја чуваме средината во која живеме и работиме – велат од Аеродром.