Денес, во Виенската Палата на правдата повторно ќе се најде во центарот на вниманието поранешниот австриски канцелар Себастијан Курц, кој треба да се појави појави пред судот поради жалбената постапка што ја води против пресудата со која, во февруари 2024 година беше осуден на осум месеци условна затворска казна. Курц беше прогласен за виновен за лажно сведочење пред парламентарната истражна комисија за аферата „Ибица“, конкретно во делот што се однесува на неговата улога во изборот на членовите на надзорниот одбор на државната холдинг компанија ОЕБАГ.

Судот од прв степен тогаш оцени дека Курц, иако формално не ја отфрлил својата вмешаност, сепак оставил лажен впечаток дека бил речиси целосно надвор од тој процес, што судијата го оцени како доволно за да го смета исказот за лажно сведочење. Од друга страна, Курц беше ослободен од вина во врска со именувањето на тогашниот директор на ОЕБАГ, Томас Шмид. Покрај него, осуден беше и неговиот поранешен шеф на кабинет Бернхард Бонели, кој доби шест месеци условна казна. И двајцата поднесоа жалба, тврдејќи дека нивните изјави не биле лажни, туку евентуално нецелосни, нешто што, според нивните адвокати, не претставува кривично дело во смисла на австрискиот кривичен законик.

Денешната јавна расправа ќе започне во 9:00 часот и беше закажана да трае три часа, без присуство на сведоци. Случајот е во надлежност на Вишиот покраински суд во Виена, кој треба да реши дали ќе ја потврди пресудата, ќе ја измени, ќе донесе ослободителна пресуда или пак ќе го врати предметот на повторно разгледување во првостепениот суд. Адвокатите на Себастијан Курц, Отто Дитрих и Валтер Супан, истакнаа дека нивниот клиент недвосмислено признал дека бил вклучен во изборот на надзорниот одбор, и дека не постои намера или обид за манипулација. Одбраната дополнително се повика на тоа дека судот во прв степен го осудил Курц, не затоа што дал неточен одговор, туку затоа што одговорот бил оценет како „нецелосен“, што според нив, не е доволно за осудителна пресуда за лажно сведочење.

Важноста на денешната одлука не е само правна, туку и политичка. Себастијан Курц, кој во меѓувреме се повлече од политиката и се префрли во приватниот сектор, ја гради својата нова кариера во САД, но исходот од оваа судска постапка би можелa засекогаш да влијае врз неговото јавно и политичко наследство. Одлуката на жалбениот суд, доколку биде донесена денес, ќе биде правосилна и нема да може да се оспорува. Меѓутоа, можно е судот да процени дека постојат нерешени правни прашања и да го врати предметот на ново судење, што би го пролонгирало случајот.

Медиумскиот интерес е исклучително голем – бројни австриски и странски новинари се веќе присутни во зградата на судот. Портпаролката на судот, Сузане Лер, посочи дека фактот што расправата е јавна не значи автоматски дека ќе има конечна одлука денес, и дека процедурата е стандардна кога се работи за двајца обвинети, како што е случајот со Курц и Бонели.

Судската одлука што треба да произлезе од оваа жалбена постапка ќе покаже дали поранешниот канцелар Себастијан Курц ќе остане обременет со правосилна пресуда, или ќе добие ослободителна пресуда која би можела да отвори врата за негов евентуален политички ангажман во иднина.