Албанскиот политички блок го забрза темпото на подготовки за претстојните парламентарни избори. Долго најавуваната коалиција меѓу Алијансата за Албанците и Алтенатива денеска конечно се официјализираше. Лидерите на партиите Зијадин Села и Африм Гаши потпшаа меѓупартиски договор за заедничка коалиција за вонредните парламентарни избори на 12 април. На прес-конференција, беше речено дека целта на новата коалиција ќе биде победа во албанскиот политички блок и влез во владина коалиција.

– Многу е битно да се направи промена во албанскиот блок. Ние сакаме таа победа да ја оствариме заедно. Легитимитетот на нашата коалиција да биде целосен после 12 април. Тоа е многу битно и за демократијата и за настаните кои ќе се одвиваат понатаму – рече претседателот на Алтернатива Африм Гаши.

Од друга страна, за несудениот трет коалициски партнер, БЕСА кој не успеа да се договори со Алијансата и Алтернатива, во јавноста се шпекулира дека би можел да се сврти кон преговори со СДСМ и ДПА. Дали е возможна ваква коалиција веројатно ќе се знае веќе наредната недела. Лидерот на ДПА, Мендух Тачи, има свои барања во новата власт да не влезе и ДУИ и да добие вицепремирска позиција, а од БЕСА пак во власта да не партиципира ДПА.

И додека за првпат се подготвува македонско-албанска коалиција, од ДУИ денеска испорачаа нови услови до идните коалициски партнери. Освен ветинг за политичари, обвинтели и судии, барат и повторо судење на некои случаи.

– Повторно судење на транспарентен начин, меѓународно мониторирање и презумпција на невиност, се предуслови за враќање на довербата во судството во случаите како „Монструм“, „Сопот“, „Алфа“, „Алмир“, „Саздо“ и многу други – рече Агим Нухиу од ДУИ.

Претседателот на СДСМ Зоран Заев, денеска пак порача дека со ДУИ ги решиле сите крупни прашања во Владата и дека како партија која има голем избор за соработка со албанските партии очекува и нови преговори.

– Очекувам дека ќе најдеме сили првпат да направиме предизборна коалиција со партии од албанскиот блок. Коалициите ќе бидат задржани и малку проширени, а тоа нема да биде подоцна од 9 март, кога е закажан конгресот на СДСМ – рече Заев.