Ако се чувствувате лошо, ве боли грло и имате температура, можеби сте се заразиле со еден од новите соеви на Ковид што циркулираат оваа есен.

XFG, наречен Stratus и NB.1.8.1, познат како Nimbus, сега се најчестите варијанти кои се шират во Велика Британија, според официјални лица, пишува Би-би-си. Експертите велат дека овие не претставуваат поголема закана од претходните видови на Ковид, односно немаат полоши симптоми.

Сепак, неодамнешните генетски промени што ги стекнал вирусот може да ги зголемат инфекциите. Според некои извештаи, може да има карактеристични симптоми кај најновите соеви – рапав глас или болно грло.

Ковид сè уште може да предизвика широк спектар на симптоми, вклучувајќи главоболка, кашлање, затнат или растечен нос и исцрпеност, што го отежнува разликувањето од настинка или грип.

Експертите предупредуваат дека доколку некој мисли дека имате Ковид, треба да избегнува контакт со ранливи лица и доколку е можно да остане дома.

„Доколку имате симптоми и треба да ја напуштите куќата, советот е да носите маска за лице. Редовното миење на рацете и користењето и фрлањето марамчиња во канти може да го намали ширењето на оваа и други респираторни заболувања. За болно грло, пиењето многу течности и пиењето лажичка мед може да помогнат, наведуваат експертите.

Од Агенцијата за безбедност на здравјето на Велика Британија (UKHSA) велат дека е нормално вирусите да мутираат и да се менуваат, и како што повеќе податоци ќе станат достапни за овие варијанти, ќе има подобро разбирање за тоа како тие комуницираат со нашиот имунолошки систем и како да ја оптимизираме нашата заштита, како и мерките што можеме да ги преземеме за да ги заштитиме најранливите и да го живееме нашиот живот што е можно понормално.

„Врз основа на достапните информации досега, нема докази што сугерираат дека варијантите предизвикуваат потешка болест или дека вакцините што се користат во моментов ќе бидат помалку ефикасни против нив“ вели д-р Алекс Ален, консултант епидемиолог во UKHSA.

Имајте на ум дека е можно повторно да се заразите со Ковид дури и ако сте го имале неодамна или сте биле вакцинирани. Реинфекциите обично се благи, но можете да се чувствувате лошо и сепак да го ширите вирусот на други лица.