Националната установа Музеј на тетовски крај претпладнево започна да го санира Споменикот на револуцијата во Тетово, кој беше оштетен минатиот месец, од засега се уште непознати сторители.

-Започнавме да го санираме брутално оштетениот Споменик на Револуцијата. Овој споменик е од вистинско значење за Македонија, да ги зачуваме вистинските вредности и спомените на оние кои ја донесоа слободата. Апелираме ваквите вандалски дејствија да не се повторуваат, соопштија од Муејот на тетовкси крај .

На 23 септември со камења беше вандализиран Споменикот на револуцијата во Тетово. Искршен беше предниот дел од ова спомен обележје, посветено на загинатите борци на Народно – ослободителната војна.

Од Сојузот на борци Тетово, го осудија овој чин кој го нарекоа нецивилизациски атак врз симболот на антифашистичката борба на македонскиот народ и на другите националности, кои несебично се жртвуваа за национална слобода.

Оттаму побараа сторителите да бидат откриени и кривично да одговараат за стореното.

Споменикот на револуцијата во Тетово со години е мета на вандали, но досега надлежните, ниту ги откриле вандалите, ниту пак имаат некого осомничено.

Овој споменик е поставен во 1962 година, а е изработен од вајарката Борка Аврамова (1924-1993). Оригиналното име е Споменик на победата, додека во Тетово е познат како Споменик на револуцијата.