И покрај суровата сила на амазонската прашума и немилосрдниот притисок од фармерите, дрвосечачите и трговците со дрога, едно мало изолирано племе успеало да се справи со сите притисоци, да го зголеми својот број и со години успешно да избегнува контакт со светот надвор од својата заедница.

Нивните неодамна објавени фотографии го обиколуваат светот, но никој навистина не знае како тие се нарекуваат себеси, како комуницираат, како го организираат својот живот или во што веруваат.

? Amazon ormanlarının modern dünyadan izole halkı “Massaco”, ilk kez otomatik kameralarla görüntülendi.

Nüfusları 200-250 kişi arasında.#Amazon pic.twitter.com/pynyTpKNkV

— fermendte (@fermendte) December 22, 2024

Мистериозното племе истражувачите го нарекоа Масако, според реката што тече покрај нивното живеалиште, а бразилската Национална фондација за домородни народи (Фунаи), која работи со децении на заштита на териториите, тврди дека од раните 1990-ти нивниот број е најмалку двојно зголемен и дека сега бројат меѓу 200 до 250 членови.

Истражувачите поставиле камери на местото каде што членовите на племето понекогаш оставаат метални алатки со која им сигнализираат на своите „непријатели“ да се држат настрана од нив, а откриле и дека овие голи мажи се вешти ловци, со лакови долги и до три метри. Племето живее номадски и се движи низ прашумите, но никому сè уште не му е јасно кои се всушност тие.

Ги има сè повеќе

Новите фотографии, вели Алтаир Алгаер, владин агент кој поминал повеќе од три децении заштитувајќи ја територијата на Масаките со организацијата Фунаи, откриле сличност со народот Сирионо, кој живее на спротивниот брег на реката Гуапоре во Боливија, пишува The Guardian.

И покрај демографската катастрофа што го снајде домородното население предизвикана од вековната узурпација и уништувањето на животната средина, растот на населението меѓу изолираните народи е тренд низ Амазонија. Во 2023 година, научното списание Nature откри растечка популација долж границите на Бразил со Перу и Венецуела, а сателитски снимки покажаа сè поголеми култивирани парцели и повеќе населби.

„Проценуваме дека денес ги има од 35 до 40, а кога почнав да работам во 1999 година, беа околу 20“, вели Жаир Кандор, надгледувач на една од тие заедници.

Бразил воведе иновативна јавна политика на неконтактирање со племињата во 1987 година, а Перу, Колумбија, Еквадор и Боливија усвоија слична политика.

„Овие народи имаат право на живот на нивната земја и на начин на живот каков што избрале да живеат, но почитувањето на правата на изолираните домородни народи е исто така фундаментално и за зачувување на тропските шуми“, рече Пауло Мутињо, коосновач на Институтот за истражување на околината на Амазонија.