Федералната полиција на Бразил денеска соопшти дека пронашла докази дека поранешниот бразилски претседател Жаир Болсонаро планирал државен удар за да ги поништи резултатите од изборите во октомври 2022 година, кои ги загуби од Луис Инасио Лула да Силва, и дека „знаел за планот Лула да биде убиен“.

Според последниот полициски извештај од 884 страници, објавен денеска откако Врховниот суд го испрати до јавниот обвинител, има осум клучни докази кои ги поддржуваат обвиненијата за обид за државен удар против Болсонаро, пренесе „Ројтерс“.

Меѓу доказите е и стенограм од состанокот што Болсонаро го свикал во декември 2022 година со тројца команданти на вооружените сили, каде што им бил претставен план за државен удар и каде од нив било побарано да се приклучат на заговорот.

Командантите на армијата и воздухопловните сили го одбиле, а командантот на морнарицата, сега пензионираниот адмирал Алмир Гарние, рекол дека е подготвен да го поддржи планот, покажа истрагата.

Полицијата утврдила дека Болсонаро (69) „знаел за планот за убиство на избраниот претседател Лула и неговиот потпретседател Жералдо Алкмин, врз основа на телефонскиот разговор на заговорниците и средбите во претседателската палата Алворада во Бразилија“.

Државниот обвинител Пауло Гоне ќе одлучи дали ќе го обвини Болсонаро и другите наводни заговорници.