Македонскиот репрезентативец Дарко Чурлинов би можел да остане во полскиот шампионат, но во дресот на Легија Варшава, која сериозно е заинтересирана да го донесе во своите редови.

По успешната позајмица во редовите на Јагелонија, Чурлинов се врати во англискиот Барнли, но според најавите од Полска, тешко дека ќе остане на „Островот“. Легија веќе воспоставила контакт со англискиот клуб и се надева дека ќе успее да го ангажира македонскиот офанзивец, кој има уште една година од актуелниот договор со Барнли.

Чурлинов во минатата сезона одигра импресивни 43 натпревари за Јагелонија, при што постигна седум голови и забележа четири асистенции – бројки што го направија атрактивен за повеќе клубови во регионот.